నానాదిక్కుల నరులెల్లా – అన్నమయ్య సంకీర్తన

॥పల్లవి॥
నానాదిక్కుల నరులెల్లా
వానలలోననే వత్తురు గదలి
read
॥చ1॥
సతులు సుతులుఁ బరిసరులు బాంధవులు
హితులు గొలువఁగా నిందరును
శతసహస్రయోజనవాసులు సు-
వ్రతములతోడనె వత్తురు గదలి
॥చ2॥
ముడుపులు జాళెలు మొగిఁదల మూఁటలు
కడలేనిధనముఁ గాంతలును
కడుమంచిమణులు కరులుఁ దురగములు
వడిగొని చెలఁగుచు వత్తురు గదలి
॥చ3॥
మగుటవర్ధనులు మండలేశ్వరులు
జగదేకపతులుఁ జతురులును
తగువేంకటపతి దరుశింపఁగ బహు-
వగలసంపదల వత్తురు గదలి

రాగము: ఆహిరి
రేకు: 0067-01
సంపుటము: 1-346