కలిగినది యొక్కటే కమలాపతిసేవ – అన్నమయ్య సంకీర్తన

॥పల్లవి॥
కలిగినది యొక్కటే కమలాపతిసేవ
తెలుప కొంగిచ్చేను దిబ్బెము దొడికేను
॥చ1॥
హరియే పరతత్వ మతఁడొక్కఁడే గతి
ధరలోన దేవతలెందరైనాఁ గలుగనీ
మురహరనామము ముంచి యొక్కటే యొక్కుడు
యిరవైనమంత్రము లెన్నియైనా నుండనీ
॥చ2॥
గోవిందుదాసులే పెక్కువఘను లిందరిలో
వేవేలు పెద్ద లటు వేలసంఖ్య లుండనీ
కైవసపువిష్ణుకైంకర్యమే సాధనము
యీవలనావల పుణ్య మెంతైనాఁ గలుగనీ
॥చ3॥
పట్టినశ్రీవేంకటేశుభక్తి యొక్కటే ఘనము
యిట్టే శాస్త్రజ్ఞాన మెట్లున్నాను
వొట్టిన యాతని ముద్ర లొక్కటికి మూలము
యెట్టిలాంఛనము లిల నెన్నియైనా నుండనీ

రాగము: మలహరి
రేకు: 0090-02
సంపుటము: 1-442