ఏది తుద దీనికేది మొదలు

॥పల్లవి॥
ఏది తుద దీనికేది మొదలు
పాదుకొను హరి మాయఁ బరగు జీవునికి
॥చ1॥
ఎన్ని బాధలు దనకు నెన్ని లంపటములు
యెన్ని వేదనలు మరియెన్ని దుఃఖములు
యెన్ని పరితాపంబు లెన్నిదలపోఁతలు
యెన్ని చూచిన మరియు నెన్నైనఁ గలవు
॥చ2॥
యెన్ని కొలువులు దనకు నెన్ని యనుచరణలు
యెన్ని యాసలు మరియు నెన్ని మోహములు
యెన్ని గర్వములు దనకెన్ని దైన్యంబులివి
ఇన్నియునుఁ దలఁప మరి యెన్నైనఁ గలవు
॥చ3॥
యెన్నిటికిఁ జింతించు నెన్నిటికి హర్షించు
నెన్నిటికి నాసించు నెన్నిటికిఁ దిరుగు
యిన్నియును దిరు వేంకటేశులీలలు గాఁగ_
నెన్ని చూచినను దా నెవ్వఁడునుగాఁడు

రాగము: బౌళి
రేకు: 0017-02
సంపుటము: 1-102