ఆపద్బంధుఁడు హరి మాకుఁ గలఁడు – అన్నమయ్య సంకీర్తన

॥పల్లవి॥
ఆపద్బంధుఁడు హరి మాకుఁ గలఁడు
దూపలి తలఁచినా దోషహరము
॥చ1॥
గరుడనినెక్కినఘనరేవంతుఁడు
గరుడ కేతనముగలరథుఁడు
గరుడఁడే తనకును గరియగుబాణము
గరిమె నీతఁడేపో ఘనగారుడము
॥చ2॥
పాముపరపుపై బండినసిద్ధుడు
పాముపాశముల పరిహరము
పామున నమృతముఁ పడఁదచ్చినతఁడు
వేమరు నీతఁడే విషహరము
॥చ3॥
కమలాక్షుఁ డీతఁడు కమలనాభుఁడును
కమలాదేవికిఁ గైవశము
అమరిన శ్రీవేంకటాధిపు డితఁడే
మమతల మాకిదే మంత్రౌషధము

రాగము: సామంతం
రేకు: 0089-04
సంపుటము: 1-438