ఆతుమ సంతసపెట్టుటది యెఱుక, తా- – అన్నమయ్య సంకీర్తన

॥పల్లవి॥
ఆతుమ సంతసపెట్టుటది యెఱుక, తా-
నేతెరవు నొల్లకుండు టిదియే యెఱుక
॥చ1॥
ముంచినబంధములలో ముణుఁగుడువడక తా-
నంచల విడఁదన్ను టది యెఱుక
చంచలపువిషయాల సగ్గుడుముగ్గుడుగాక
యెంచిఁ హరిఁదలపోయు టిదియే యెఱుక
॥చ2॥
పాయనియర్ధములకు బంటుబంటై తిరుగక
ఆయతమై మోసపోని దది యెఱుక
పాయపుఁగామినులతోఁ బలుమారుఁ జేయుపొందు
హేయమనితలపోయు టిదియే యెఱుక
॥చ3॥
ధరమీఁదఁగల ప్రాణితతుల నొప్పించక
ఆరయఁగ సముఁడగు టది యెఱుక
గరిమల శ్రీవేంకటపతిదాసుఁడై
యిరవొంద సుఖించు టిదియే యెఱుక

రాగము: లలిత
రేకు: 0079-03
సంపుటము: 1-378