అదివో అల్లదివో హరివాసము – అన్నమయ్య సంకీర్తన

॥పల్లవి॥
అదివో అల్లదివో హరివాసము
పదివేలుశేషుల పడగల మయము
॥చ1॥
అదె వేంకటాచల మఖిలవున్నతము
అదివో బ్రహ్మాదుల కపురూపము
అదివో నిత్యనివాస మఖిలమునులకు-
నదె చూడుఁడదె మొక్కుఁడానంద మయము
॥చ2॥
చెంగట నల్లదివో శేషాచలము
నింగినున్న దేవతల నిజవాసము
ముంగిట నల్లదివో మూలనున్న ధనము
బంగారు శిఖరాల బహు బ్రహ్మమయము
॥చ3॥
కైవల్యపదము వేంకటనగ మదివో
శ్రీవేంకటపతికి సిరులైనది
భావింప సకలసంపద రూపమదివో
పావనములకెల్లఁ బావనమయము

రాగము: శ్రీరాగం
రేకు: 0004-03
సంపుటము: 1-23